निवडणुकांचे बिगुल वाजलं आहे. विधानसभा निवडणुकीसाठी सर्व राजकीय पक्ष जोरदार तयारीला लागले आहेत. राजकीय पक्ष अनेक बैठका, पत्रकार परिषद घेत आहेत. निवडणूक आयोगाने पत्रकार परिषद घेत निवडणुकांच्या तारखा जाहीर केल्या.

20 नोव्हेंबर रोजी विधानसभा निवडणूक पार पडणार असून 23 नोव्हेंबरला निवडणुकांचे निकाल लागणार आहेत. याच पार्श्वभूमीवर आदित्य ठाकरे आज वरळीतून उमेदवारी अर्ज भरणार आहेत. मात्र महायुतीचा वरळीचा उमेदवार अद्याप निश्चित नाही आहे.

आदित्य ठाकरे सकाळी 10 वाजता उमेदवारी अर्ज दाखल करणार असून लोअर परळ पश्चिम येथील शिवालय सभागृहासमोरील शिवसेना शाखा क्रमांक 198 येथून आदित्य ठाकरे मिरवणुकीने वरळी इंजिनीयरिंग हब बीएमसी कार्यालयाकडे रवाना होणार आहेत.

शक्तिप्रदर्शन करत आदित्य ठाकरे उमेदवारी अर्ज दाखल करणार असून यावेळी शिवसेनेचे नेते, पदाधिकारी तसेच शिवसैनिक, युवासैनिक आणि महाविकास आघाडीचे कार्यकर्ते मोठ्या संख्येने मिरवणुकीत सहभागी होणार आहेत.