अलिबागचे शिंदे गटाचेआमदार महेंद्र दळवी यांनी महावितरण अधिकाऱ्यावर केलेल्या दादागिरीची एक ऑडिओ क्लिप समोर आली आहे. ऑडिओ क्लिपमधील समोरची व्यक्ती महेंद्र दळवी असल्याची माहिती आहे. महेंद्र दळवी आणि अधिकाऱ्यामधील ही कथित ऑडिओ क्लिप व्हायरल झाल्याने नवा वाद उभा राहिला आहे. या कथित क्लिपमध्ये आमदार दळवी अधिकाऱ्याला शिवीगाळ करत असल्याचं दिसत आहे. मार खाण्यापेक्षा बदली करून जा असंही आमदार दळवी म्हणत असल्याचे समोर येत आहे. तसेच मुरुडमध्ये अधिकाऱ्याकडून लोकांना त्रास देण्यात आल्याचे दळवी यांच्या वक्तव्यातून दिसत आहे. यामध्ये अधिकाऱ्याची बदली करा अन्यथा त्याला माझी पोर मारतील असं आमदार म्हणत असल्याचं स्पष्ट होत आहे. या व्हायरल क्लिपमुळे आमदार दळवींच्या अडचणीत वाढ झाल्याचे बोलले जात आहे. तर लोकशाही मराठी या क्लिपची पुष्टी करत नाही.