Team India Practice Session Cancelled, IND vs CAN : रोहित शर्माच्या नेतृत्त्वात टीम इंडियाने टी-२० वर्ल्डकपमध्ये आतापर्यंत चमकदार कामगिरी केली आहे. ग्रुप स्टेजमध्ये झालेल्या तिन्ही सामन्यांमध्ये टीम इंडियाने विजय मिळवला आहे. आता भारत ग्रुप स्टेजमधील शेवटचा सामना १५ जूनला कॅनडाविरोधात खेळणार आहे. हा सामना सुरु होण्याआधी एक मोठी अपडेट समोर आली आहे. मीडिया रिपोर्ट्सनुसार, फ्लोरिडात खराब वातावरण आणि पावसामुळं भारतीय संघाचं प्रॅक्टिस सेशन रद्द करण्याचा निर्णय घेण्यात आला आहे.

फ्लोरिडात गेल्या काही दिवसांपासून सलग पावसानं थैमान घातलं आहे. आज शुक्रवारी फ्लोरिडात पाऊस पडण्याची ७०-८० टक्के शक्यता वर्तवण्यात आली आहे. त्यामुळे फ्लोरिडात होणाऱ्या या सामन्याला पावसाचा फटका बसू शकतो. सामन्यादरम्यानही पाऊस पडण्याची शक्यता वर्तवण्यात आली आहे.

भारतीय संघाने ग्रुप स्टेजमध्ये आतापर्यंत तीन सामने खेळले आहेत. भारताने हे तिन्ही सामने न्यूयॉर्कच्या नासाऊ काउंटी इंटरनॅशनल क्रिकेट स्टेडियममध्ये खेळले आहेत. न्यूयॉर्कमध्ये खेळवण्यात आलेले सर्व सामने भारताने जिंकले आहेत. भारताने न्यूयॉर्कमध्ये झालेल्या पहिल्या सामन्यात आर्यलँडचा ८ विकेट्सने पराभव केला.

त्यानंतर दुसऱ्या सामन्यात भारताने पाकिस्तानला पराभवाची धूळ चारली. त्यानंतर भारताने तिसऱ्या सामन्यातही अमेरिकेचा पराभव करून विजय मिळवला. भारताने ७ विकेट्सने यूएसएचा पराभव करून सामना खिशात घातला. आता भारतीय संघ कॅनडाविरोधात सामना जिंकून मिशन बारबाडोससाठी सज्ज होईल, अशी आशा आहे.