जगातील महान फुटबॉलपटूंपैकी एक लिओनेल मेस्सीला कोरोनाची लागण झाली आहे. मेस्सी फ्रेंच फुटबॉल लीग 1 मध्ये पॅरिस सेंट जर्मेन (PSG) क्लबकडून खेळत आहे. 34 वर्षीय मेस्सी आणि क्लबच्या इतर 3 खेळाडूंचा कोविड-19 अहवाल रविवारी पॉझिटिव्ह आला. क्लबने याला दुजोरा दिला आहे.

नुकताच बार्सिलोना संघातून पीएसजी संघात आलेल्या मेस्सीने मानाचा 'बॅलन डी'ओर हा पुरस्कार सातव्यांदा पटकावला होता. सध्या मेस्सी संघासोबत फ्रेंच कप खेळत असून नुकत्याच झालेल्या सामन्यांतर पीएसजी संघात कोरोनाने शिरकाव केला आहे. पीएसजी संघातील मेस्सीसह जुआन बर्नाच, सर्जिओ रिको आणि नथान बीटमाजाला यांना कोरोनाची बाधा झाली आहे. मेस्सीसह संघातील कोरोनाबाधित सध्या विलगीकरणात असून त्यांची योग्य ती काळजी मेडीकल टीम घेत असल्याचं पीसएजी संघानं सांगितलं आहे.