विकास माने, बीड
परळीच्या वैद्यनाथ मंदिराची तोडफोड करण्यात आल्याची माहिती मिळत आहे. माजी नगराध्यक्षाकडून मंदिराच्या शिखराची तोडफोड करण्यात आली आहे. माजी नगराध्यक्ष दीपक देशमुखांकडून शिखराची तोडफोड करण्यात आली आहे.
त्यामुळे आता बीडच्या परळीतील ज्योतिर्लिंग वैद्यनाथ मंदिराच्या सुरक्षेचा प्रश्न पुन्हा एकदा ऐरणीवर आला आहे. वैद्यनाथ मंदिराच्या शिखरावर पायथ्याला शिवलिंग होते. जुन्या काळापासून या ठिकाणी परळीकर दर्शनाला जायचे मात्र वैजनाथ देवस्थान ट्रस्टने हे शिवलिंग काढून ही जागा बंद केल्याने देशमुख यांनी ही आक्रमक भूमिका घेतल्याची माहिती मिळत आहे.
मंदिर संस्थानने बंद केलेल्या जागेची हातोड्याने तोडफोड करण्यात आल्याचे पाहायला मिळत असून वैद्यनाथ देवस्थान ट्रस्टने याप्रकरणी परळी शहर पोलीसांत धाव घेत तक्रार दाखल केली आहे.
वैद्यनाथ मंदिराच्या शिखराच्या पायथ्याशी असलेल्या एका खिडकीसारख्या जागेत बांधकाम करून निर्माण केलेली ही भिंत फोडून टाकण्यात आली. माजी नगराध्यक्ष दीपक देशमुख यांनी वैद्यनाथ मंदिराच्या शिखराकडे जाणाऱ्या रस्त्यावरील कुलूप तोडून शिखरावर प्रवेश करत बांधकाम करून निर्माण केलेली ही भिंत फोडून टाकली.