Pune Car Accident Case : पुण्यातील विकसक विशाल अग्रवाल यांच्या अल्पवयीन मुलाने मद्यधुंद अवस्थेत पोर्शे कार चालवून कल्याणी नगर परिसरात दोन जणांचा बळी घेतला होता. या हिट अँड रन प्रकरणात आज न्यायालयाने आरोपी विशाल अग्रवालला तीन दिवसांची पोलीस कोठडी सुनावली. दुसरीकडे, अल्पवयीन मुलाला बालसुधारगृहात १४ दिवस (५ जूनपर्यंत) ठेवण्यात येणार असल्याचा निर्णय बाल हक्क मंडळाने दिला आहे. या प्रकरणात अल्पवयीनचा जामीन रद्द करण्यात आला असून त्याला रिमांड होममध्ये ठेवण्याचा निर्णय घोषित करण्यात आला आहे. संपूर्ण तपास होईपर्यंत त्याला बालसुधारगृहात ठेवण्यात येणार आहे. तपास पूर्ण झाल्यानंतर अल्पवयीन अज्ञान आहे की सज्ञान याबाबत निर्णय घेतला जाणार आहे.

पोर्शे कार जप्त करण्याचा पुणे RTO चा निर्णय

या अपघात प्रकरणात कारची नोंदणी एका वर्षासाठी रद्द करण्यात आली आहे. तसच अल्वयीन विरोधातही परिवहन विभागाने कारवाईचा बडगा उगारला आहे. वयाच्या २५ व्या वर्षापर्यंत वाहन चालवण्याचा परवाना आरोपीला दिला जाणार नाही. तसच या आलिशान कारची तात्पुरती नोंदणी वाहन मोटर कायद्याच्या तरतुदीनुसार रद्द करण्यात आली आहे. एक वर्षासाठी कोणत्याही परिवहन कार्यालयात नोंदणी करण्याची परवानगी दिली जाणार नाही. पोर्शे कार एका वर्षासाठी जप्त करण्यात येणार आहे.