सिंहगड परिसरात कालपासून पडणाऱ्या मुसळधार पावसामुळे सिंहगड परिसरातील ओढे नाले तुडुंब पाण्याने भरून वाहू लागले आहेत. आज सकाळी गोळेवाडी ते आतकरवाडी सिंहगड पायथा रस्त्यावरील पुल पाण्याखाली गेला. आतकरवाडी घेरा सिंहगडमधील रहिवासी नागरिकांचा आणि पर्यटकांचा देखील काही काळ संपर्क तुटला होता. काही पर्यटक अडकून पडले होते.
सिंहगड रोड येथील एकता सोसायटी आणि आजूबाजूच्या परिसरात मोठ्या प्रमाणात पाणी शिरले आहे. खडकवासला धरणातून मोठ्या प्रमाणात पाण्याचा विसर्ग केल्यानंतर मुठा नदीच्या पात्रातलं पाणी सोसायट्यांमध्ये शिरला आहे. गुडघाभर पाणी साचल्याने नागरिकांची तारांबळ उडाली आहे. नागरिकांना रेस्क्यू करण्याचं काम अग्निशामक दलाकडून केलं जात आहे. अनेक गाड्या अडकून पडल्या आहेत.
पुण्यात पावसाचा हाहाकार पाहायला मिळत आहे. पालिकेचे दीडशे कर्मचारी सध्या रेस्क्यू करत आहेत. सिंहगड रोडवरील ज्या ज्या सोसायटीत पाणी साचलंय तिथे शेकडो नागरिक अडकले आहेत. पाटबंधारे विभागाकडून पूर्व सूचना दिली नसल्याने पाण्याचा प्रवाह वाढल्याचं पालिका अधिकाऱ्यांचं म्हणणं आहे.