लोकशाही न्यूज नेटवर्क | भिवंडीत आग लागण्याचे सत्र सुरु झाले असून सरवली एमआयडीसी परीसरातील कपिल रेयॉन इंडिया प्रा लि या डाईंग कंपनीला भीषण आग लागली आहे. कंपनीच्या दोन मजली इमारतीमध्ये सगळीकडे आग पसरली आहे.
या कंपनीत कच्च्या कपड्याचा आणि पक्क्या कपड्याचा मोठ्या प्रमाणावर साठा तसेच धागा होता. या आगीवर नियंत्रण मिळविण्यासाठी अग्निशमन दलाच्या दोन गाड्या घटनास्थळी दाखल झाल्या असून कल्याण, ठाणे आणि एमआयडीसीच्या अग्निशमन दलाच्या गाड्यांची मदत मागण्यात आली आहे.
सर्वत्र मोठ्या प्रमाणावर धुराचे लोट पसरले आहेत. रात्री उशिराच्या सुमारास या कंपनीत आग लागली. त्यावेळी या कंपनीत असलेले 30 ते 40 कामगार वेळेत बाहेर पडल्याने त्यांचा जीव बचावला. सध्या आगीवर नियंत्रण मिळवण्यासाठी अग्निशमन दलाचे जवान शर्थीचे प्रयत्न करत आहेत. मात्र पाण्याच्या कमतरतेमुळे अडचण निर्माण होत आहे. तसेच दोन्ही मजले आगीच्या भक्ष्यस्थानी पडल्याने कंपनी जळून खाक झाली आहे. त्यामुळे कोट्यवधींचे नुकसान या ठिकाणी झाले आहे.