बेळगाव (Balgaum) मधील बादल अंकलगी गावात मुसळधार पावसात घराची भिंत कोसळून सात जणांचा मृत्यू झाला आहे. बुधवारी रात्री साधारणत: 9 वाजण्याच्या सुमारास ही घटना घडली आहे. मृत्यू झालेले सर्वच्या सर्व सातही जण हे एकाच कुटुंबातील असल्याची माहिती समोर आली आहे. या घटनेनंतर परिसरात हळहळ व्यक्त करण्यात येत आहे.

मिळालेल्या माहितीनुसार, बादल अंकलगी गावात ही घटना घडली. घटनेची माहिती मिळताच स्थानिक नागरिक, अग्निशमन दलाचे जवान आणि पोलीस घटनास्थळी दाखल झाले. या दुर्घटनेत घटनास्थळीच पाच जणांचा मृत्यू झाला तर दोघांचा रुग्णालयात उपचारादरम्यान मृत्यू झाला. मृतकांमध्ये दोन आठ वर्षांच्या मुलींचाही समावेश आहे.

अंबरनाथमध्ये भिंत कोसळून दोघांचा मृत्यू

बुधवारी सायंकाळच्या सुमारास मुंबई, ठाणे, नवी मुंबई, कल्याण-डोंबिवली, अंबरनाथ-बदलापूर परिसरात मुसळधार पाऊस बरसला. याच दरम्यान अंबरनाथमध्ये एक भिंत कोसळली आणि त्याखाली दोघेजण दबले गेले. या दुर्घटनेत दोघांचाही मृत्यू झाला असल्याची माहिती समोर आली आहे.