पंतप्रधान नरेंद्र मोदी यांच्या पुणे दौऱ्यानिमित्त उद्या वाहतूक व्यवस्थेत मोठे बदल

थोडक्यात

पंतप्रधान नरेंद्र मोदी यांचा उद्या पुणे दौरा

दौऱ्यानिमित्त वाहतूक व्यवस्थेत मोठे बदल

पंतप्रधान नरेंद्र मोदींची उद्या जाहीर सभा

निवडणुकांचे बिगुल वाजलं आहे. विधानसभा निवडणुकीसाठी सर्व राजकीय पक्ष जोरदार तयारीला लागले आहेत. राजकीय पक्ष अनेक बैठका, पत्रकार परिषद, सभा घेत आहेत. निवडणूक आयोगाने पत्रकार परिषद घेत निवडणुकांच्या तारखा जाहीर केल्या.

20 नोव्हेंबर रोजी विधानसभा निवडणूक पार पडणार असून 23 नोव्हेंबरला निवडणुकांचे निकाल लागणार आहेत. याच पार्श्वभूमीवर उद्या पंतप्रधान नरेंद्र मोदी यांची सभा पुण्यात होणार आहे. पंतप्रधान मोदी यांची जाहीर सभा टिळक रस्त्यावरील स. प. महाविद्यालयाच्या मैदानावर होणार आहे.

या भागातील रस्ते वाहतुकीस बंद ठेवण्यात येणार असून सदाशिव पेठेतील विजयानगर कॉलनी परिसरातील ना. सी. फडके चौक ते नाथ पै चौक दरम्यानचा रस्ता वाहतुकीस बंद राहणार आहे.

त्यामुळे ना. सी. फडके चौकातून डावीकडे वळून नीलायम चित्रपटगृहमार्गे पर्वती उड्डाणपुलाखालील रस्त्याने सिंहगड रस्त्याकडे प्रवास करावा लागणार आहे. वाहतूक शाखेचे पोलीस उपायुक्त अमोल झेंडे यांनी नाथ पै चौकातून वाहनचालकांनी सरळ सिंहगड रस्त्याकडून जावे असे आवाहन केलं आहे.