माजी मंत्री सुरेश नवले बीड विधानसभा मतदारसंघातून निवडणूक लढणार; म्हणाले...

विकास माने, बीड

विधानसभा निवडणुकीच्या पार्श्वभूमीवर सर्व राजकीय पक्ष तयारीला लागले आहेत. निवडणूक आयोगाने पत्रकार परिषद घेत निवडणुकांच्या तारखा जाहीर केल्या. 20 नोव्हेंबर रोजी विधानसभा निवडणूक पार पडणार असून 23 नोव्हेंबरला निवडणुकांचे निकाल लागणार आहेत.

याच पार्श्वभूमीवर आता माजी मंत्री सुरेश नवले बीड विधानसभा मतदारसंघातून निवडणूक लढणार असल्याची माहिती मिळत आहे. यातच त्यांनी अंतरवाली सराटी येथे मनोज जरांगे पाटील यांची भेट देखील घेतली आहे.

याच पार्श्वभूमीवर प्रतिक्रिया देताना सुरेश नवले म्हणाले की, या अगोदरही जरांगे पाटील यांना मी विनंती केलेली आहे. बीड मतदारसंघातून मी निवडणूक लढवणार आहे. आपण आपला पाठिंबा मला द्यावा. पूर्वीही मी त्यांच्याशी चर्चा केलेली आहे. काल ही त्यांच्या भेटीला गेलो होतो. काल निर्णय काही झाला नाही. निवडणूक लढवायची नाही लढवायची. परंतु 20 तारखेला बहुधा पाटलांचा निर्णय होईल.

यासोबतच ते म्हणाले की, निवडणूक लढवायची असेल तर काय करायचे निवडणूक लढवायची नसेल तर काय करायचे 20 तारखेला सर्व समाज बांधवांच्या उपस्थितीमध्ये हा ते निर्णय घेणार आहेत. माझी विनंती आहे की, जरांगे पाटील यांचा पाठिंबा मला मिळाला तर आनंद आहे. जरांगे पाटील यांची त्सुनामी आहे. विधानसभेच्या निवडणुकीमध्ये दिसेलच. असे सुरेश नवले म्हणाले.