Paris Olympic Archery: तिरंदाजीमध्ये दमदार कामगिरी; भारतीय पुरुष आणि महिला संघ उपांत्यपूर्व फेरीत
पॅरिस ऑलिम्पिक सुरू होण्यासाठी आता अवघे काही तास उरले आहेत. तत्पूर्वी, गुरुवारी रँकिंग आणि पात्रता फेरीसाठी भारतीय तिरंदाज लेस इनव्हॅलाइड्स गार्डन्सवर उतरले. दुपारी महिलांचे सामने झाले, त्यात भारतीय संघाने उत्कृष्ट कामगिरी करत उपांत्यपूर्व फेरीत प्रवेश केला. त्याचवेळी सायंकाळी झालेल्या पुरुषांच्या सामन्यात भारतीय तिरंदाजांनी दमदार कामगिरी करत उपांत्यपूर्व फेरीत प्रवेश केला. रँकिंग फेरीत भारतीय पुरुष संघ तिसऱ्या तर महिला संघ चौथ्या स्थानावर राहिला.
तरुणदीप राय, धीरज बोम्मादेवरा आणि प्रवीण जाधव यांनी पुरुष तिरंदाज क्रमवारीत आणि पात्रता फेरीत भारताचे प्रतिनिधित्व केले. तिघांनीही चांगली कामगिरी करत भारताला उपांत्यपूर्व फेरीत नेले. धीरज बोम्मादेवरा पुरुषांच्या क्रमवारीत चौथ्या स्थानावर राहिला. भारताने तिसरे स्थान मिळवून उपांत्यपूर्व फेरी गाठली.
तरुणदीप राय या सामन्यात 14व्या स्थानावर राहिला. त्याचा स्कोर 674 आहे. तर, प्रवीण रमेश जाधव 658 गुणांसह 39व्या स्थानावर आहे. कोरियाचा किम वूजिन 686 गुणांसह पहिला तर त्याचा सहकारी किम जे देओक 682 गुणांसह दुसऱ्या स्थानावर आहे. वूजिनच्या नावावर ऑलिम्पिक रेकॉर्ड आहे. 2016 च्या रिओ दि जानेरो ऑलिम्पिकमध्ये त्याने 700 च्या स्कोअरसह ऑलिम्पिक विक्रम प्रस्थापित केला. त्याच वेळी, जर्मनीचा उनरुह फ्लोरियन तिसऱ्या क्रमांकावर राहिला. त्याचा स्कोर 681 होता. अमेरिकेच्या ॲलिसन ब्रॅडीचा विक्रम एकही पुरुष तिरंदाज मोडू शकला नाही. त्याने 7 ऑगस्ट 2019 रोजी 702 गुणांसह जागतिक विक्रम केला.
