jasprit bumrah : आशिया चषक सुरू होण्यापूर्वीच भारतीय क्रिकेट संघाला सर्वात मोठा धक्का बसला आहे. स्टार वेगवान गोलंदाज जसप्रीत बुमराह दुखापतीमुळे जवळपास बाहेर आहे. 27 ऑगस्टपासून यूएईमध्ये सुरू होणाऱ्या या स्पर्धेत भारताचा पहिला सामना 28 ऑगस्टला पाकिस्तानशी होणार आहे. या सामन्याच्या 20 दिवस आधी भारताला ही वाईट बातमी मिळाली. या स्पर्धेसाठी भारतीय संघाची अद्याप निवड झालेली नाही, मात्र मिळालेल्या माहितीनुसार, बुमराह पाठीच्या दुखापतीने त्रस्त आहे, त्यामुळे निवड समितीवर तणाव निर्माण झाला आहे. (jasprit bumrah injured ruled out asia cup 2022 indian cricket team)
बुमराहच्या दुखापतीबद्दल बीसीसीआयकडून अद्याप कोणतेही अधिकृत विधान आलेले नाही, परंतु या स्पर्धेसाठी महान भारतीय वेगवान गोलंदाजाची निवड होणार नाही हे निश्चित आहे. वृत्तसंस्था पीटीआयने एका वृत्तात म्हटले आहे की, टी-20 विश्वचषकामुळे भारतीय निवड समिती बुमराहबाबत कोणताही धोका पत्करू इच्छित नाही आणि त्यामुळेच त्याची या स्पर्धेत निवड होणार नाही.
यूएईमध्ये होणाऱ्या या स्पर्धेसाठी संघाची निवड सोमवार, 8 ऑगस्ट रोजी होणार होती, मात्र अद्याप त्याबाबत कोणतीही स्पष्ट माहिती नाही. वृत्तानुसार, बीसीसीआयच्या एका वरिष्ठ अधिकाऱ्याने नाव न सांगण्याच्या अटीवर सांगितले की, जसप्रीत बुमराहच्या पाठीला दुखापत झाली असून तो आशिया कपमध्ये खेळणार नाही. तो आमचा प्रमुख गोलंदाज आहे आणि आमची इच्छा आहे की त्याने टी-20 विश्वचषकापूर्वी त्याची गती परत मिळवावी. आशिया कप संघात त्याचा समावेश करून आम्हाला धोका पत्करायचा नाही, त्यामुळे त्याची दुखापत आणखीनच वाढू शकते.
