उरलेल्या चपातीपासून बनवा 'हे' खास सँडविच; सर्वांनाच आवडेल

Chapati Sandwich : जर तुमच्याकडे दुपारच्या जेवणासाठी चपाती शिल्लक असेल तर तुम्ही वेगळ्या प्रकारचे तयार करण्याच्या विचारात असाल तर ही रेसिपी तुम्ही नक्की ट्राय करु शकता. या रेसिपीचे नाव चपाती स्पेशल सँडविचची फ्यूजन रेसिपी आहे. हे तुम्ही पटकन आणि सहज बनवू शकता आणि पोटही भरेल. तुम्ही डाएट करत असाल तरीही ही रेसिपी तुमच्यासाठी उत्तम आहे. चला तर मग जाणून घेऊया रेसिपी...

साहित्य

उरलेली चपाती, कांदा, सिमला मिरची, कॉर्न, कोरडी कैरी पावडर, धनेपूड, तिखट, मीठ, कोबी, टोमॅटो केचप, मेयोनेझ, किसलेले चीज आणि बटर

कृती

एका कढईत तेल गरम करा. कांदा, सिमला मिरची आणि कॉर्न घाला. ते काही मिनिटे तळून घ्या. आता त्यात कोरडी कैरी पावडर, धनेपूड, तिखट आणि मीठ घाला. चांगले मिसळा. जर मिश्रण खूप कोरडे वाटत असेल तर 2-3 चमचे पाणी घाला. शेवटी कोबी घाला, आणखी दोन मिनिटे शिजवा आणि गॅस बंद करा. आता व्हेज मिश्रणात टोमॅटो केचप आणि मेयोनेझ घालून हलक्या हाताने मिक्स करा.

उरलेल्या चपातीवर मिश्रण पसरवून चपाती सँडविच तयार करा. संपूर्ण मिश्रण वापरा आणि अर्धी चपाती व्यवस्थित भरा. आता वर किसलेले चीज घाला आणि चपाती अर्धी दुमडून घ्या. एका पॅनमध्ये थोडं बटर गरम करा आणि त्यात तुमची तयार चपाती सँडविच ठेवा. दोन्ही बाजू हलके सोनेरी तपकिरी होईपर्यंत शिजवा.