गडचिरोली : राज्य राखीव पोलीस दलाच्या (SRPF) दोन जवानांनी एकमेकांवर गोळ्या झाडून हत्या केल्याची धक्कादायक घटना गडचिरोली (Gadchiroli) येथे घडली आहे. याप्रकरणी पोलीस स्टेशनमध्ये नोंद झाली असून पुढील तपास सुरु आहे. श्रीकांत बेरड, बंडू नवथरे अशी मृतकांची नावे आहेत. दोघेही दौंड पुणे येथील एसआरपीएफ कॅम्पचे जवान होते.
गडचिरोली जिल्ह्यातील अहेरी तालुक्यातील मरपल्ली पोलीस मदत केंद्र येथे श्रीकांत बेरड आणि बंडू नवथरे तैनात होते. या दोन्ही जवानांनी वैयक्तिक वादातून रायफलमधून एकमेकांवर गोळीबार केल्याची माहिती पोलिसांनी दिली आहे. यामध्ये गोळी लागून दोघांचाही मृत्यू झाला आहे.
घटना घडल्यानंतर उत्तरीय तपासणीसाठी दोन्ही जवानांचे शव जिल्हा सामान्य रूग्णालय येथे आणण्यात आले आहे. वरिष्ठ पोलीस अधिकाऱ्यांनी घटनास्थळी भेट देऊन पुढील तपास करण्याचे आदेश दिल्याची माहिती सुत्रांकडून प्राप्त झाली आहे.
