राजकोट किल्ल्यावरील छत्रपती शिवाजी महाराजांचा पुतळा कोसळला; शिल्पकार जयदीप आपटेला अटक

सिंधुदुर्ग येथील मालवणच्या राजकोट किल्ल्यावर उभारण्यात आलेला छत्रपती शिवाजी महाराजांचा पूर्णाकृती पुतळा कोसळला. याच पार्श्वभूमीवर आता शिल्पकार जयदीप आपटेला अटक करण्यात आली आहे. कल्याणच्या राहत्या घरातून पोलिसांनी जयदीप आपटेला ताब्यात घेतलं आहे.

राजकोट किल्ल्यावरील छत्रपती शिवाजी महाराजांचा पुतळा कोसळण्याच्या घटनेनंतर जयदीप आपटे फरार होता. त्याला शोधण्यासाठी पोलिसांनी 7 पथके रवाना केली होती. जयदीप आपटे गेल्या 2 आठवड्यांपासून फरार होता.

यासोबतच सिंधुदुर्ग जिल्हा पोलीस अधीक्षक सौरव अग्रवाल यांनी जयदीप आपटेविरोधात लूकआऊट नोटीस जारी केली होती आणि आता जयदीप आपटेला पोलिसांनी ताब्यात घेतलं आहे.