राणा दाम्पत्य दिल्ली दरबारी जाणार; तुरुंगात झालेला छळ PM मोदींना सांगणार

अमरावती : आमदार रवी राणा (Ravi Rana) आणि खासदार नवनीत राणा (Navneet Rana) हे गेल्या काही दिवसांपासून शिवसेनेसोबतच्या वादामुळे चर्चेत आहेत. त्यांना दोन दिवसांपूर्वी जामीन मिळाला असून, सध्या नवणीत राणा लीलावती रुग्णालयात (Lilavati Hospital) उपचार घेत आहे. नवणीत राणांना आज सायंकाळी किंवा उद्या सकाळी रुग्णालयातुन डिस्चार्ज मिळण्याची शक्यता आहे. रुग्णालयातून डिस्चार्ज मिळाल्यानंतर त्या थेट दिल्ली (Delhi) गाठणार असल्याची शक्यता आहे.

रुग्णालयातून डिस्चार्ज मिळताच नवनीत राणा व रवी राणा दिल्लीत जाणार असल्याती माहिती समोर आली आहे. दिल्लीला जाऊन नवनीत राणा पंतप्रधान नरेंद्र मोदी व लोकसभा अध्यक्ष ओम बिर्ला यांना भेटणार असल्याची शक्यता आहे. कारागृहात झालेल्या छळाची त्या दिल्लीत तक्रार करणार असल्याची माहिती समोर आली आहे. ठाकरे सरकारविरोधात राणा दाम्पत्य केंद्र सरकारकडे तक्रार करणार आहेत.