Video Viral : महात्मा गांधी हिंदूंचे मारेकरी, यति नरसिंहानंद यांच आक्षेपार्ह वक्तव्य
mahatma gandhi : श्री पंचदशनम जुना आखाड्याचे महामंडलेश्वर यती नरसिंहानंद यांनी राष्ट्रपिता महात्मा गांधी यांच्याबद्दल अत्यंत आक्षेपार्ह वक्तव्य केलं आहे. यतीने गांधीजींना हजारो हिंदूंचे मारेकरी म्हटले आणि अनेक अपशब्द उच्चारले. हा व्हिडिओ व्हायरल झाल्यानंतर पोलिसांनी गाझियाबादच्या मसुरी पोलिस ठाण्यात यतीविरुद्ध गुन्हा दाखल करून तपास सुरू केला आहे. यती नरसिंहानंद हे त्यांच्या भडकाऊ आणि आक्षेपार्ह वक्तृत्वामुळे चर्चेत राहिले आहेत. (mahatma gandhi killer of hindus says yati narsinghanand)
सोशल मीडियावर व्हायरल झालेल्या व्हिडिओची दखल घेत मसुरी पोलिसांनी यति नरसिंहानंद यांच्यावर धार्मिक भावना भडकावल्याप्रकरणी गुन्हा दाखल केला आहे. मसुरी पोलिसांनी दिलेल्या माहितीनुसार, दोन मिनिटे 20 सेकंदांचा व्हिडिओ ट्विटरवर टाकण्यात आला होता. यामध्ये दसना देवी मंदिराचे महंत आणि श्री पंचदशनाम जुना आखाड्याचे महामंडलेश्वर यती नरसिंहानंद गिरी यांनी राष्ट्रपिता महात्मा गांधी यांच्यावर भाष्य केले आहे.
'गांधींमुळे हिंदूंना स्वतःची जमीन नाही'
व्हिडीओमध्ये त्यांनी महात्मा गांधींना हजारो हिंदूंचे मारेकरी असे अपमानास्पद संबोधित केले आहे. यती नरसिंहानंद यांनी व्हिडिओमध्ये म्हटले आहे की, ते संपूर्ण भारतात प्रचार करणार आहेत. महात्मा गांधींमुळे शंभर कोटी हिंदूंकडे स्वतःची एक इंचही जमीन नाही आणि त्यांच्यामुळे आजही आपले संत, महात्मा तुरुंगात जात आहेत.
राष्ट्रपिताविरुद्ध अपमानास्पद शब्दांचा वापर
मसुरी पोलिस स्टेशनमध्ये तैनात असलेले उपनिरीक्षक डॉ. रामसेवक यांनी नोंदवलेल्या अहवालात इतर आक्षेपार्ह टिपण्णींमुळे महात्मा गांधींच्या चारित्र्यावरही प्रश्न उपस्थित करण्यात आले आहेत. यासोबतच त्यांचे वर्णन ब्रिटीश आणि इतर समाजाचे दलाल म्हणून करण्यात आले आहे. यती नरसिंहानंद गिरी यांच्या या वक्तव्यामुळे समाजातील शांतता व कायदा व सुव्यवस्था बिघडण्याची शक्यता व्यक्त करून उपनिरीक्षकांनी गुन्हा दाखल करण्याची लेखी तक्रार दिली. एसपी ग्रामीण डॉ. इराज राजा यांनी सांगितले की, यती नरसिंहानंद गिरीविरुद्ध धार्मिक भावना भडकावल्याप्रकरणी गुन्हा दाखल करून पुढील कारवाई करण्यात येत आहे.
