Rohit Pawar On BJP: "...ती भाजपची स्टाईल आहे"; आमदार रोहित पवारांनी स्पष्टच सांगितलं
Rohit Pawar Speech : पिंपरी- चिंचवड शहराचा विकास स्थानिक आणि महाराष्ट्राच्या कानाकोपऱ्यातून शहरात स्थायिक झालेल्या नागरिकांनी केला आहे. पिंपरी चिंचवड शहराच्या विकासाचं श्रेय काही जण घेतात. जसा व्हाडप्या असतो, तो म्हणतो सर्व मीच केलं, जो भाजी, मीठ, भाकरी, स्वयंपाक बनवतो अशा सर्व लोकांना श्रेय जातं. पण, काही लोकांना श्रेय स्वतः कडे ठेवावं लागतं, मी पणा आहे, ती भाजप ची स्टाईल आहे, भाजप मध्ये मी पणा चालतो, पण इथं तो मी पणा चालत नाही, असं म्हणत राष्ट्रवादी काँग्रेस पक्षाचे शरद पवार गटाचे आमदार रोहित पवार यांनी विरोधकांवर निशाणा साधला.
पिंपरी चिंचवड येथील कार्यक्रमात रोहित पवार म्हणाले, १२ डिसेंबरला शरद पवार यांचा ८५ वा वाढदिवस आहे. ८५-९० जागा लढू, पण कमीत कमी आपले ८५ आमदार निवडून आले पाहिजेत, असा विचार आणि निर्धार आम्ही ठेवला आहे. तिन्ही विधानसभा आपल्याकडे याव्यात यासाठी मी प्रयत्न करतोय.
लोकसभेत पैशांची काय किंमत आहे हे जनतेनं दाखवून दिलं. अमोल कोल्हे, सुप्रिया सुळे, बजरंग सोनवणे यांचा विरोधात खर्च केला गेला. पैशांच्या पुढे लोकशाहीची ताकद जास्त आहे हे दाखवून दिलं आहे. महानगर पालिकेच्या निवडणुकीमध्ये 85 नगरसेवक निवडून आले पाहिजेत. हात वर करून मोठ्या आवाज द्या, तो घुमला पाहिजे, उद्या कोणाची सभा असेल तिथं केवळ पवार साहेबांचा आवाज घुमला पाहिजे, असं म्हणत रोहित पवारांनी अजित पवारांना टोला लगावला.