"...तर संजय राऊत पुन्हा अपक्षांवर खापर फोडतील, माझा मतदानाचा अधिकार त्यांना द्या"

राज्यसभा निवडणूकीत शिवसेना नेते संजय राऊत यांनी अपक्ष आमदार देवेंद्र भुयार यांनी मतदान केलं नसल्याचा आरोप केला होता. आता विधानपरिषद निवडणूकीत सुद्धा देवेंद्र भुयार यांनी शंका उपस्थित करु नये म्हणून माझ्या मतदानाच्या टेबल समोर संजय राऊत यांना उभे करा अन्यथा माझ्या मतदानाचा अधिकार संजय राऊत यांना देऊन टाका. तसं मी निवडणूक विभागाला देखील पत्र लिहणार असल्याची प्रतिक्रिया आमदार देवद भुयार यांनी दिली. मी पूर्वीपासून महाविकासआघाडी सोबत आहे. माझ्यावर शंका घेण्याचं कारण नाही. विधानपरिषद निवडणूकीत महाविकास आघाडीचा उमेदवार निवडून येईल यात काही शंका नाही. विधान परिषदेत जर महाविकास आघाडीचा एखादा उमेदवार पराभूत झाला, तर संजय राऊत पुन्हा अपक्षांवर खापर फोडतील हे मला शंभर टक्के माहित आहे. त्यामुळे माझ्या वतीने संजय राऊत यांना मतदानाचा अधिकार द्यावा अशी मागणी आमदार देवेंद्र भुयार यांनी केल्यानं खळबळ उडाली आहे.