काँग्रेसच्या उमेदवार प्रणिती शिंदे यांच्या पत्रावर भाजपाचे उमेदवार राम सातपुते यांचे उत्तर म्हणाले...
सोलापूरमध्ये लोकसभेसाठी महाविकास आघाडीकडून काँग्रेसच्या आमदार प्रणिती शिंदे यांनी उमेदवारी देण्यात आलेली आहे. तर सोलापूर लोकसभेसाठी आमदार राम सातपुते यांना भाजपाकडून उमेदवारी जाहीर करण्यात आली आहे. याच पार्श्वभूमीवर आता काँग्रेसच्या उमेदवार प्रणिती शिंदे यांनी भाजपाचे उमेदवार राम सातपुते यांना पत्र लिहिलं आहे.
प्रणिती शिंदे यांच्या पत्राला उत्तर देत राम सातपुते म्हणाले की, मी २०१९ पासून सोलापूर जिल्ह्यातील माळशिरस विधानसभा मतदारसंघाचं प्रतिनिधित्व करतोय. मी आमदार झाल्यापासून ते आजतोवर मी माझ्या मतदारसंघातील जनतेच्या, आणि त्यायोगे सोलापूर जिल्ह्यातील जनतेच्या सेवेत माझ्या परीने प्रामाणिकपणे होईल तेवढी विकासकामे करण्याचा प्रयत्न केलाय.
मी ज्या भारतीय जनता पक्षाचा कार्यकर्ता आहे, तिथे आम्ही समाजाला एकसंध ठेवण्यासाठी मा. नरेंद्र मोदीजींच्या नेतृत्वात "सबका साथ, सबका विकास, सबका विश्वास, सबका प्रयास" या मंत्राला सार्थ ठरवत समाजातील शेवटच्या घटकाच्या कल्याणासाठी झटत आहोत. समाजात धर्म, जातीपातीत फूट पाडून कुणी एवढं वर्ष राजकारण केलंय, हे सोलापूरच्याच नव्हे तर पूर्ण देशाच्या जनतेनं आता चांगलंच ओळखलंय.
राजकारणाची कुठलीही पार्श्वभूमी नसलेल्या एका ऊसतोड कामगाराच्या कुटूंबात जन्मलेल्या माझ्यासारख्या सामान्य कार्यकर्त्यावर भारतीय जनता पार्टीने जो विश्वास दाखवलाय, त्याला सोलापूरचा सर्वांगिण विकास करून सार्थ ठरवण्यासाठी मी नक्कीच प्रयत्नशील राहीन. असे राम सातपुते म्हणाले.
