मुंबईकरांनो काळजी घ्या! हवेचा दर्जा सातत्याने खालावतोय
मुंबई शहरात धुलिकणांच्या प्रमाणाने धोकादायक पातळी गाठली आहे. त्यामुळे सध्या शहरातील हवा नागरिकांच्या आरोग्यासाठी धोकादायक असून त्याचे परिणाम दिसून येत आहेत. सतत वाढत असलेल्या प्रदूषणामुळे मुंबईतील हवेचा दर्जा खालावत आहे. हवा गुणवत्ता निर्देशांकानुसार हवेतील पीएम २.५ आणि पीएम १० या धुलीकणांचे प्रमाण सातत्याने वाढत आहे. नेव्ही नेगर कुलाबा येथे सोमवारी सायंकाळी हवा निर्देशांक २३७ होता. तसेच देवनारमध्ये २४६, कांदिवलीत २४६, भायखळ्यात १९५, वरळीत १३३, वांद्रे-कुर्ला संकुलात १६८, शिवडीत १२६, मालाडमध्ये १९२ इतका हवा निर्देशांक नोंदला गेला.
थोडक्यात
मुंबईतील हवेचा दर्जा सातत्याने खालावत आहे.
कुलाबा, देवनार, कांदिवलीमधील हवा 'वाईट'
समीर अॅपच्या नोंदीनुसार शहरातील हवेचा दर्जा काही दिवसांपासून 'मध्यम' श्रेणीत
मागील काही दिवसांपासून मुंबईतील हवेचा दर्जा सातत्याने खालावू लागला आहे. समीर अॅपच्या नोंदीनुसार शहरातील हवेचा दर्जा काही दिवसांपासून ‘मध्यम’ श्रेणीत नोंदला जात आहे. वातावरणातील घातक पीएम २.५ आणि पीएम १० धुलिकणांचे प्रमाण वाढले आहे.नेव्ही नगर, कुलाबा येथे सोमवारी सायंकाळी वाईट हवेची नोंद झाली. तिथे हवा गुणवत्ता निर्देशांक २३७ नोंदवला गेला. याबरोबर देवनार, कांदिवली परिसरातही ‘वाईट’ हवेची नोंद झाली. येथील हवा निर्देशांक अनुक्रमे २४६ इतका होता. असे वातावरण आरोग्यासाठी हानिकारक ठरू शकते. याशिवाय भायखळा, वरळी, वांद्रे-कुर्ला संकुल, शिवडी आणि मालाड परिसरातील हवा ‘मध्यम’ असल्याची नोंद सोमवारी करण्यात आली.
दरम्यान, नेव्ही नगर कुलाबा, तसेच देवनार येथे पीएम २.५ कणांची मात्रा अधिक आहे. पीएम २.५ हे अधिक घातक असून ते श्वसनाद्वारे शरारीत जातात, त्याचे हवेतील सामान्य प्रमाण हे ३५ मायक्रो घनाहून जास्त नसावे. हे कण पीएम १० च्या तुलनेत सूक्ष्म असल्याने सहज शरारीत प्रवेश करतात. त्यामुळे ते आरोग्यास घातक ठरतात. धुलीकणांत कार्बन सल्फेट, कार्बन डायऑक्साइड, सल्फर डायऑक्साइड, नायट्रोजन ऑक्साइड यांचे प्रामाण अवाक्याबाहेर वाढल्यास ते धोकादायक ठरते. यामुळे श्वसन आणि त्वचेशी संबंधित आजार वाढतात. श्वसन विकारात दमा, न्युमोनिया, फुफ्फुसाचा कर्करोग, श्वसन नलिकेला सूज, दम लागणे तसेच त्वचा कोरडी राहणे, फाटणे, लाल होणे, खाज येणे अशा समस्यांचे प्रमाण वाढले आहे.
