भरधाव कंटेनरच्या धडकेने वाहतूक पोलिसाचा मृत्यू

लोकशाही न्यूज नेटवर्क

भरधाव कंटेनरच्या धडकेत वाहतूक पोलीस मृत्यूमुखी पडल्याची धक्कादायक घटना नाशिक महामार्गावर घडली आहे. कर्तव्यावर असलेल्या वाहतूक पोलिसाला भरधाव वेगाने येणाऱ्या कंटेनरने धडक दिली. यामध्ये वाहतूक पोलिसाचा जागीच मृत्यू झाला. यामुळे नाशिक ग्रामीण पोलीस दलावर शोककळा पसरली आहे.

रस्ता सुरक्षा सप्ताहात दुर्दैवी घटना

नाशिक जिल्ह्यात सुरू असलेल्या रस्ता सुरक्षा सप्ताहात ही दुर्दैवी घटना घडली आहे. त्यामुळे जिल्ह्यातील रस्ता सुरक्षा सप्ताहला गालबोट लागलंय.

नाशिक-पेठ महामार्गावर कर्तव्य बजावत असलेले पोलीस हवालदार कुमार गायकवाड हे नेहमी प्रमाणे वाहनांची तपासणी करत होते. तपासणी सुरू असताना समोरून भरधाव वेगाने आलेल्या कंटेनर चालकाचे नियंत्रण सुटले. त्यामुळे हवालदार कुमार गायकवाड यांच्या अंगावरून कंटेनरचे चाक गेले. यानंतर त्यांचा जागीच मृत्यू झाला. या घटनेमुळे ग्रामीण पोलीस दलावर शोककळा पसरली आहे. वरिष्ठ अधिकारी घटनास्थळी दाखल झाले असून कंटेनर चालकाला तातडीने ताब्यात घेण्यात आले आहे. अद्याप प्रकरणाचा छडा लावण्याचे काम सुरू आहे.