Crime : जालन्यात डुकरांच्या वाटणीतून तरुणावर गोळीबार

रवी जयस्वाल | जालना : बुलेटवरून आलेल्या 3 अज्ञातांनी गावठी पिस्तूलातून तरुणावर गोळीबार केल्याची घटना घडली आहे. या गोळीबारात एक तरुण गंभीर जखमी झाला आहे. जीवन जाधव असे गोळीबारात जखमी झालेल्या तरुणाचं नाव आहे. जालना जिल्ह्यातील परतुर तालुक्यातील हातडी येथे आज सकाळी ही घटना घडली. डुकराच्या वाटणीवरून गोळीबार झाल्याचा संशय आहे.

हातडी येथील घनसावंगी तालुक्यातील कंडारी परतुर येथे जीवन जाधवकडे पाळलेली डुकरे आहेत. आज सकाळी जीवन जाधव हा डुकरांची देखभाल करण्यासाठी हातडीत आला होता. यावेळी बुलेटवरून आलेल्या अज्ञात 3 इसमांनी त्याच्यावर गावठी पिस्तूलातून गोळ्या झाडल्या. या घटनेत जीवन जाधव डोक्याला गोळ्या लागल्याने गंभीर जखमी असून, पोलिसांनी तातडीने त्याला उपचारासाठी जालना येथे हलविले आहे.

या घटनेनंतर परतुर पोलिसांनी तातडीने घटनास्थळ गाठून जखमींना मदतकार्य केलं. बुलेटवरून आलेले हल्लेखोर हे तिघेजण असून ते गोळ्या झाडून पसार झाल्याची माहिती समोर आली आहे. या प्रकरणी पोलीस अधिक तपास करत आहेत.