shivsena crisis : शिवसेनेनंतर आता युवा सेनेलाही झटका ; 200 युवा सैनिक शिंदे गटात सहभागी
मंगेश जोशी | जळगाव : शिवसेना नेते एकनाथ शिंदे (Eknath Shinde) यांनी शिवसेनेत मोठी बंडखोरी केल्यापासून शिवसेनेत आमदारांची आणि नेतेमंडळींची गळतीच लागल्याचं पाहायला मिळत आहे. अशातच आता जळगावमध्ये शिवसेनेनंतर युवा सेनेलाही मोठा फटका बसला असल्याची माहिती मिळत आहे. महाराष्ट्रात प्रथमच युवासेनात फूट पडली असून युवा सेनेचे 80 पदाधिकारी आणि 200 युवा सैनिक शिंदे गटात सहभागी झाले आहे. त्याचबरोबर आमदार गुलाबराव पाटील यांच्या उपस्थितीत अजिंठा विश्रामगृहावर युवा सेनेच्या पदाधिकाऱ्यांनी शिंदे गटात प्रवेश केला आहे. एकीकडे युवा सेनेचे नेते आदित्य ठाकरे (Aditya Thackeray) यांची राज्यभरात निष्ठा यात्रा सुरू असताना दुसरीकडे मात्र जळगाव युवा सेनेला मोठा धक्का बसला आहे.
मुख्यमंत्री एकनाथ शिंदे यांनी शिवसेनेतील 50 आमदारांना सोबत घेत वेगळी राजकीय वाट निवडली. भाजप आणि शिंदे यांच्या नेतृत्वाखाली आमदारांनी राज्यात सत्ता स्थापन केली असून, आता एकनाथ शिंदे यांना विविध भागातील पदाधिकाऱ्यांकडून पाठिंबा मिळताना दिसत आहे. त्यांना मिळणारा पाठिंबा दिवसेंदिवस वाढत चालला आहे.
याआधी ठाणे त्यानंतर कल्याण डोंबिवली, अंबरनाथ-बदलापूर, उल्हासनगर, नवी मुंबई येथील शिवसेनेच्या अनेक माजी नगरसेवकांनी एकनाथ शिंदे यांना आपला पाठींबा जाहीर केलेला आहे. तर भिवंडी, मुरबाड, शहापूर, वसई विरार, पालघर या पट्ट्यातील अनेक माजी नगरसेवक, जिल्हा परिषद, पंचायत समिती सदस्य हेदेखील शिंदे यांच्या गटात सामील झाले आहेत.
