प्रशांत जगताप | सातारा : पुणे- बंगलोर राष्ट्रीय महामार्गावर कराडजवळ 22 प्रवासी घेऊन निघालेली ट्रॅव्हल्स पलटी झाल्याने भीषण अपघात झाला आहे. आज पहाटे 6 वाजण्याच्या सुमारास ही घटना घडली आहे. यामध्ये 22 पैकी 8 प्रवासी किरकोळ जखमी झाले आहेत
मुंबईहून कोल्हापूरला प्रवासी घेऊन निघालेली ट्रॅव्हल्स (एमएच-09- ईएम- 4876) चा गोटे गावच्या हद्दीत अपघात झाला. चालकाचा ताबा सुटल्याने गाडी डिव्हायडरला धडकली व ट्रॅव्हल्स 15 ते 20 फूट फरफटत गेली होती. ट्रॅव्हल्स पलटी झाल्याचा मोठा आवाज आल्याने पहाटे लोकांची मोठी धावपळ उडाली.
ट्रॅव्हल्समधील 22 पैकी 8 प्रवासी किरकोळ जखमी झाले आहेत. यामध्ये विराज विठ्ठल शिंदे (वय 24, रा. चिपळूण), दिलीप रतोबा जाधव (वय 64, रा. कोल्हापूर), संजय श्रीमंत भोसले (वय 42), सचिन श्रीमंत भोसले (वय 37, दोघेही रा. सानपाडा), गजेंद्र मारूती भिसेल (वय- 35, रा. कोल्हापूर), तुकाराम महादेव पाटील (वय- 48, रा. मानखुर्द), अन्सारी असउद्दीन इल्लास (वय- 25, रा. नांदेड) तर अन्य एकजण अशी जखमींची नावे आहेत.
कराडनजीक हायवेवर असलेल्या हॉटेल महेद्रा समोर हा अपघात झाला. यावेळी हायवे हेल्पलाइन पेट्रोलिंग इन्चार्ज दस्तगीर आगा, महेश होवाळ आणि कराड शहर पोलीस स्टेशनचे खालीक इनामदार, महामार्ग पोलीस स्टेशनचे लोखंडे यांनी तात्काळ घटनास्थळी धाव घेत जखमींना कराड शहरात उपचारासाठी रूग्णालयात दाखल केले. तसेच, महामार्गावर खोळंबलेली वाहतूक सुरळीत केली आहे.
