Sandeep Deshpande : बाळासाहेब कुठे आणि राज्यसभेसाठी दाढ्या कुरवाळणारे कुठे
मुंबई : राज्यसभेची निवडणूक 10 जून रोजी पार पडणार असून यासाठी शिवसेना आणि भाजपने कंबर कसली आहे. या निवडणुकीत दोन्ही पक्षांनी एक अतिरिक्त उमेदवार दिल्याने भाजप (BJP) आणि शिवसेना (Shivsena) यांच्यात चुरशीची लढत आहे. येथे सहाव्या जागेवर विजयाची चावी २९ आमदारांच्या हातात आहे. यासाठी दोन्हीही पक्षांनी अपक्ष आमदारांचे मत आपल्या पारड्यात पाडून घेण्यासाठी जोर लावला आहे. यावरुन मनसे नेते संदीप देशपांडे (Sandeep Deshpande) यांनी मुख्यमंत्री उध्दव ठाकरे यांच्यावर टीका केली आहे.
संदीप देशपांडे म्हणाले, हिंदुहदय सम्राट बाळासाहेब ठाकरे यांची मला आठवण येते की तत्त्वासाठी सत्तेवर लाथ मारणारे बाळासाहेब कुठे. आणि ते एका राज्यसभेच्या जागेसाठी एमआयएम आणि समाजवादीच्या दाढ्या कुरवाळणारे आमचे नंबर वन कुठे. संभाजीनगरमध्ये तोफ धडाडणार सगळे म्हणतात लवंगी वाचली तरी पुरे आहे, अशा शब्दांत त्यांनी उध्दव ठाकरे यांच्यावर टीका केली आहे.
दरम्यान, मुख्यमंत्री उध्दव ठाकरे यांची आज औरंगाबाद येथे सभा होणार आहे. यासाठी तगडा पोलीस बंदोबस्त ठेवण्यात आला आहे. तर राज्यातील विवध भागातून नागरिक येण्याची शक्यता आहे. दरम्यान, मुख्यमंत्री सभेत काय बोलणार, याकडे सर्वांचे लक्ष लागले आहे.
