PM Narendra Modi Kashmir Visit: कलम 370 हटवल्यानंतर पंतप्रधान नरेंद्र मोदी पहिल्यांदाच काश्मीर दौऱ्यावर
PM Modi Kashmir Visit: कलम 370 हटवल्यानंतर पंतप्रधान मोदींचा हा पहिलाच काश्मीर दौरा आहे. यापूर्वी 2019 मध्ये नरेंद्र मोदी जम्मू-काश्मीरमध्ये प्रचारासाठी गेले होते. पंतप्रधान नरेंद्र मोदी आज जम्मू-काश्मीरला भेट देणार आहेत. यावेळी ते राज्याला 6400 कोटी रुपयांचा विकास प्रकल्प भेट देतील आणि 1000 तरुणांना नोकरीची नियुक्ती पत्र देतील. पंतप्रधान मोदी श्रीनगरमधील बक्षी स्टेडियममध्ये जाहीर सभेला संबोधित करणार आहेत. पंतप्रधानांच्या दौऱ्यासंदर्भात श्रीनगरमध्ये सुरक्षा व्यवस्था कडक करण्यात आली आहे. या जाहीर सभेत 2 लाखांहून अधिक लोक सहभागी होतील, असा भाजपचा दावा आहे.
या वर्षी होणाऱ्या लोकसभा निवडणुकीत पक्षाने 400 जागांचे लक्ष्य ठेवले आहे आणि ते पूर्ण करण्याची जबाबदारी पंतप्रधान नरेंद्र मोदी यांच्या हातात आहे. काश्मीर दौऱ्यापूर्वी पंतप्रधान मोदींनी 'एक्स'वर एक पोस्ट केली आहे. त्यांनी लिहिले की, 'मी 7 मार्च रोजी श्रीनगरमध्ये विकसित भारत विकसित जम्मू-काश्मीर कार्यक्रमात सहभागी होणार आहे. तेथून विविध विकासकामे राष्ट्राला अर्पण करण्यात येणार आहेत. त्यापैकी बहुतेक, कृषी-अर्थव्यवस्थेला चालना देण्यासाठी 5000 कोटी रुपयांची विकास कामे सुरू केली जातील. पर्यटनाशी संबंधित विविध कामेही राष्ट्राला समर्पित करण्यात येणार आहेत.
ज्या ठिकाणी कार्यक्रम होणार आहे त्या कार्यक्रमच्या ठिकाणी ड्रोन आणि इतर आधुनिक साहित्यांच्या माध्यमातून हवाई निगराणी केली जाणार आहे. आजूबाजूचा काही भाग ड्रोन आणि सीसीटीव्हीच्या निगराणीखाली असेल. PM मोदींनी अलीकडेच 20 फेब्रुवारी रोजी जम्मूला भेट दिली होती आणि 32 हजार कोटींच्या प्रकल्पांचे उद्घाटन केले. त्यामुळे यंदाच्या काश्मीर खोऱ्याच्या दौऱ्यात पंतप्रधान मोदी काश्मीरला काही उत्तम प्रकल्प देऊ शकतात असे बोलले जात आहे.
