सावित्रीबाई फुले पुणे विद्यापीठाचे माजी कुलगुरु डॉ. अरुण निगवेकर यांचे निधन

विद्यापीठ अनुदान आयोगाचे(यूजीसी) माजी अध्यक्ष, प्रख्यात भौतिकशास्त्रज्ञ व सावित्रीबाई फुले पुणे विद्यापीठाचे माजी कुलगुरू डॉ. अरूण निगवेकर यांचे निधन झाले आहे. त्यांचे वय 79 इतके होते. पुण्याच्या राहत्या घरी दुपारी दीर्घ आजाराने त्यांचे निधन झाले.

कोरोनाच्या वाढत्या संसर्गाच्या पार्श्वभूमीवर डॉ. निगवेकरांच्या पुण्यातील निवासस्थानी कोणीही गर्दी करू नये, असे आवाहन त्यांच्या कुटुंबीयांकडून करण्यात आलेले आहे.

कार्यकाळ

1998 ते 2000 या काळात ते पुणे विद्यापीठाच्या कुलगुरूपदावर कार्यरत होते. यानंतर 2000 ते 2005 या कालावधीत त्यांनी विद्यापीठ अनुदान आयोगाचे अध्यक्षपद भूषवले होते. याशिवाय शैक्षणिक संस्थांच्या मूल्यांकनावर शिक्कामोर्तब करणाऱ्या 'नॅक'चे ते संस्थापक संचालक देखील होते.