भंडाऱ्यात मासेमारी गेलेले 6 तरुण पुराच्या पाण्यात अडकले

मासेमारी गेलेले 6 तरुण पुराच्या पाण्यात नदीच्या मधोमध बेटावर अडकल्याची घटना भंडारा जिल्ह्याच्या पवनी येथील पाथरी येथे घडली आहे. या तरुणांच्या बचावासाठी SDRF चे एक चमू पाचरण करण्यात आले आहे. रात्रीच्या काळोख आणि नदीत पाणी वाढत असल्याने बचाव कार्यात अडचणी येत आहे.

पवनी तालुक्यातील पाथरीचे काही मासेमारी करणारे इसम वैनगंगा नदीत मासेमारी करीता गेले होते. नदीपात्रात पाण्याची वाढ झाल्यामुळे तसेच मुसळधार पाऊस होत असल्याने हे सहा जण पाथरी येथील नदीच्या मधोमध असलेल्या बेटावर अडकले.

त्यांना बाहेर काढण्यासाठी भंडारा जिल्हा शोध व बचाव पथक प्रयत्न करीत आहे. मात्र रात्रीचा काळोख असल्याने व नदीचे पात्रात पाणी खूप असल्याने बचाव कार्य करण्यास अडसर निर्माण होत आहे. या सहा जणांना सुरक्षित बाहेर काढण्यासाठी SDRF चे एक चमू तैनात करण्यात आला आहे.