एअर इंडियाची नरिमन पॉइंट येथील आलिशान २३ मजली इमारत १६०० कोटींना राज्य सरकारला विकण्यास केंद्र सरकारने हिरवा कंदील दाखवला असून राज्य मंत्रिमंडळ बैठकीत या खरेदी व्यवहारावर शिक्कामोर्तब होण्याची शक्यता आहे. केंद्र सरकारने सन २०१३ मध्ये एअर इंडियाचे मुंबईतील मुख्यालय दिल्लीत हलविण्याचा निर्णय घेतल्यानंतर मुंबईतील ही सुमारे पाच लाख चौरस फूट क्षेत्रफळाची इमारत विक्रीस काढली होती. ही इमारत मंत्रालयाच्या जवळच असल्याने तसेच मंत्रालयातील जागेची टंचाई लक्षात घेता ही इमारत उपयोगी पडणार आहे.