Virat Kohli Catch Viral Video : मैदानात मुंबई इंडियन्सची पलटण समोर असल्यावर विराट कोहलीचं आक्रमक रुप नेहमीच पाहायला मिळतं, असं त्याचे चाहते सांगतात. परंतु, आजच्या सामन्यात मुंबई इंडियन्सचा हुकमी एक्का जसप्रीत बुमराहने विराटला स्वस्तात माघारी पाठवलं आणि आरसीबीच्या चाहत्यांना एकच धक्का बसला. ९ चेंडू खेळून अवघ्या ३ धावा करणारा विराट मोठा फटका मारण्याच्या प्रयत्नात झेलबाद झाला. बॅटची कडा लागल्याने चेंडू मागच्या दिशेनं गेला अ्न विकेटकिपर ईशान किशनने हवेत उडी मारून विराटचा अप्रतिम झेल पकडला. ईशानच्या या जबरदस्त क्षेत्ररक्षणाचा व्हिडीओ सोशल मीडियावर तुफान व्हायरल झाला आहे. तर जसप्रीत बुमराहने आरसीबीविरोधात भेदक गोलंदाजी करून पंजा उघडला. बुमराहने पाच विकेट्स घेतल्याने आरसीबीच्या धावसंख्या मंदावली होती. पण दिनेश कार्तिकच्या (२३ चेंडूत ५३ धावा) धडाकेबाज फलंदाजीमुळं आरसीबीने २० षटकांत ८ विकेट्स गमावून १९६ धावांपर्यंत मजल मारली.

आयपीएलचा २५ वा सामना मुंबई इंडियन्स आणि रॉयल चॅलेंजर्स बंगलोर यांच्यात वानखेडे स्टेडियममध्ये रंगत आहे. यंदाच्या हंगामात धावांचा पाऊस पाडून ऑरेंज कॅपचा मानकरी ठरलेल्या विराट कोहलीवर आजच्या सामन्यात तमाम क्रिडाप्रेमींच्या नजरा लागल्या होत्या. परंतु, बुमराहने विराटला बाद करून चाहत्यांच्या अपेक्षांवर पाणी फेरलं.

यंदाच्या आयपीएल हंगामात विराट कोहलीने धडाकेबाज फलंदाजी करून धावांचा पाऊस पाडलाय. पाच सामन्यांमध्ये ३०० हून अधिक धावा करून विराटने प्रतिस्पर्धी संघाच्या गोलंदाजांची पुरती दमछाक केली आहे. यामध्ये एक शतक आणि दोन अर्धशतकांचा समावेश आहे. १४६ च्या स्ट्राईक रेटने धावा करणाऱ्या विराटने टीकाकारांना चोख प्रत्युत्तर दिलं आहे. विराटने राजस्थान रॉयल्सविरोधात ६७ चेंडूत १०० धावा केल्या होत्या. त्यामुळे विराटवर धीम्या स्ट्राईक रेटने फलंदाजी केल्याचा सूर टीकाकारांनी आवळला होता.